Մարտ 23, 2026
ՔԵՆԴԼ ՍՀԻ-ն արդիականացրել է իր գերարագ լազերային ենթակառուցվածքը՝ տեղադրելով Light Conversion, UAB ընկերության արտադրության կրկնման հաճախության սինքրոնացմամբ բարձրէներգիական PHAROS ֆեմտովայրկյանային լազեր, որը մատակարարվել է SIA ARMGATE ընկերության կողմից։ Սարքավորումը ձեռք է բերվել Բարձրագույն կրթության և գիտության կոմիտեից ստացված «Գիտական կենտրոնները ժամանակակից սարքավորումներով վերազինելու նպատակով գիտական սարքերի/սարքավորումների գնման հայտերի ընտրության» դրամաշնորհի շրջանակում։
Տեղադրումն ու գործարկումն իրականացվել են Light Conversion ընկերության ինժեներ Աուգուստաս Չեպենասի և ՔԵՆԴԼ ՍՀԻ-ի Ֆոտոնային փնջերի և օպտիկայի լաբորատորիայի գիտաշխատողների կողմից։
PHAROS լազերն ապահովում է բարձր-իմպուլսային էներգիա, ինչը հնարավորություն է տալիս իրականացնել առաջատար գերարագ գիտափորձեր։
Նոր PHAROS համակարգը ՔԵՆԴԼ-ի մոդուլային գերկարճ իմպուլսների լազերային հարթակի մաս է կազմում և գործում է AREAL գծային արագացուցչի հիմնական լազերային համակարգի հետ համատեղ։ Երկու համաժամանակեցված բարձր արդյունավետությամբ լազերային աղբյուրների առկայությունը զգալիորեն բարձրացնում է գործառնական ճկունությունը, հուսալիությունը և փորձարարական արտադրողականությունը։
Արդիականացված լազերային ենթակառուցվածքը կաջակցի AREAL և DELTA լաբորատորիաներում իրականացվող ընթացիկ և ապագա հետազոտական ծրագրերին՝ ավելի ամրապնդելով ՔԵՆԴԼ ՍՀԻ-ի դիրքը արագացուցչային ֆիզիկայի ոլորտում: