Հունիս 18, 2021
«ՔԵՆԴԼ» ինստիտուտում տեղադրվել և ամբողջական շահագործման է հանձնվել ZEISS ընկերության Axio Observer Research Inverted մանրադիտակը: Ֆլուորեսցենտային մանրադիտակի տեղադրումն իրականացվել է Carl Zeiss ընկերության մասնագետի կողմից, ով վերապատրաստման դասընթաց է անցկացրել «ՔԵՆԴԼ» ինստիտուտի անձնակազմի համար:
Մանրադիտակը հնարավորություն է ընձեռում ուսումնասիրություններ իրականացնել լայնաշերտ փոխանցվող լույսի, փուլային կոնտրաստի և ֆլուորեսցենտային կոնտրաստի ներքո: Սարքը համալրված է 10X, 20X, 40X և 100X օբյեկտիվներով և հնարավորություն է տալիս ուսումնասիրել ինչպես առարկայական ապակիների վրա, այնպես էլ պետրիի թասիկների (24-68 մմ և 87-92 մմ տրամագծով) և միկրոպլանշետների մեջ պատրաստված տարբեր պայմաններում գտնվող նմուշները:
Ընդհանուր առմամբ, մանրադիտակը միաժամանակ 6 ֆլուորեսցենտային ալիքների երկարությունների տակ ուսումնասիրություններ իրականացնելու հնարավորություն է տալսի: Այնուամենայնիվ, ներկայումս հնարավոր է ուսումնասիրություններ կատարել հետևյալ 4 ալիքի երկարությունների տակ.
| Ալիք | Գրգռման տիրույթ | Էմիսիայի տիրույթ | Ֆլտորոֆոր |
| Կապույտ | 365 նմ | 420 – 470 նմ | DAPI |
| Կանաչ | 450 – 490 նմ | 500 – 550 նմ | EGFP |
| Նարնջագույն | 532.5 – 557.5 նմ | 570 – 640 նմ | DsRed |
| Մոտիկ ինֆրակարմիր | 625 – 655 նմ | 665-715 նմ | Cy 5 |
«ՔԵՆԴԼ» ինստիտուտի գիտնականներին և ԱՐԵԱԼ արագացուցչի կիրառմամբ գիտական ուսումնասիրություններ իրականացնող հետազոտական խմբերին հնարավորություն է ընձեռվել օգտվել վերոնշյալ հատկություններից և ժամանակակից ու նորարարական ուսումնասիրություններ իրականացնել նյութագիտության և նանոտեխնոլոգիաների, կենսաբանության և կենսաբժշկության, պինդ մարմնի ֆիզիկայի, էլեկտրոնիկայի ու օպտիկայի, ինժեներության և շատ այլ բնագավառներում: